O Concello dedicará máis de 200.000 euros do Plan Único á mellora da súa rede de camiños

Abegondo empregará os fondos do Plan Único da Deputación á mellora da rede municipal de camiños. Así se acordou, esta mañá, durante o pleno extraordinario, o que supoñerá dedicar 207.558,96 á execución de catro proxectos para acondicionar viarios nas seguintes parroquias: Orto, Mabegondo, Cabanas, Abegondo, Montouto, Cos, Presedo, Leiro, Folgoso e Sarandós. Como se aprobou en pleno, unha parte dos fondos provinciais (267.641,82 euros) usarase para pagar gasto corrente.

O alcalde de Abegondo, José Antonio Santiso, incidiu en que, en todos os casos, trátase de “actuacións solicitadas polos propios veciños e veciñas e que servirán para mellorar o estado de varios camiños, o que suporá un reforzo na seguridade para o tráfico rodado e tamén para os peóns”.

No pleno aprobouse, ademais, o Plan Complementario de 2024, por importe de 142.793,01 euros. A contía dedicarase ao proxecto de instalación de redes de abastecemento e saneamento no Asadiño (na parroquia de Abegondo).

O Plan Único aprobouse co voto a favor do Partido Popular e do PSOE e coa abstención do BNG.

Gastos sociais
O pleno serviu tamén para aprobar o POS+Adicional para gastos sociais extraordinarios. Neste caso, a contía do ente provincial empregarase para reforzar a área de servizos sociais. En concreto, dedicaranse 76.469,09 euros dos fondos provinciais á ampliación e dotación das partidas destinadas a axudas de emerxencia social, do servizo de axuda no fogar e a outras medidas imprescindibles e urxentes para atender ás persoas especialmente vulnerables.

0 comentarios

Dejar un comentario

¿Quieres unirte a la conversación?
Siéntete libre de contribuir!

Deja una respuesta

Tu dirección de correo electrónico no será publicada. Los campos obligatorios están marcados con *