Abegondo volverá situarse este domingo, 5 de xuño, no foco do fútbol base nacional. Regresa a  Hitachi  Air  Cup, organizada polo  Concello, o San Tirso SD e o Real Club Deportivo.

O campo de O Monte, en Mabegondo, será o escenario da competición. Durante toda a xornada un total de 16 equipos daranse cita cita nun evento que congrega a algúns dos mellores clubs de categoría  benjamín de España.

Nesta edición contarase coa presenza de:  R. C. Deportivo,  C.D. Lugo, Ural  C. F., Real Madrid  C. F., Racing Club Ferrol, San Tirso  S.D., E.D. Luís Calvo Sanz,  R. C. Celta de Vigo, Real Sporting de Xixón,  SAD Ponferradina, Galicia  Caranza,  SC  Canidelo, Pavillón CF, Betanzos CF, E.D. Val Miñor e o  Rupe  Sahagún.
A competición comezará ás 10.30 horas de forma case interrompida. As semifinais están previstas para as 18.00 horas e a final para as 18.45 horas, cando os contendentes busquen o título que actualmente ostenta o Dépor, campión en 2019.

Os asistentes gozarán dunha xornada completa nas instalacións do San Tirso. A organización instalará unha carpa con diferentes opcións de menú para as familias e o resto de persoas que se acheguen a gozar dos partidos.

“Estamos orgullosos de poder recibir en Abegondo un torneo deste nivel”, expresa o alcalde de Abegondo, José Antonio Santiso. O primeiro edil sinala que se concibe o  Hitachi como “unha festa do fútbol” e agradece ao San Tirso a organización coa colaboración do Real Club Deportivo.

No evento está prevista a asistencia do vicepresidente segundo e conselleiro de Deportes, Diego Calvo, do presidente do Deportivo, Antonio Couceiro, e do presidente da Federación  Galega de Fútbol, Rafael Louzán.