Avanzan as obras do Banco de Xermoplasma, unha nova oportunidade de crecemento económico vinculada ao territorio

O alcalde de Abegondo, José Antonio Santiso, e o director xeral da Axencia Galega de Calidade Alimentaria, José Luis Cabarcos, visitaron as obras que se están executando no Centro de Investigacións Agrarias de Mabegondo (CIAM) e que darán como resultado un Banco de Xermoplasma. O rexedor apuntou a importancia de dispoñer desta instalación “única en toda España e coa que se crearán sinerxías entre o sector da investigación das sementes e o da produción”. Santiso incidiu que este Banco compartirá metas e obxectivos co futuro polígono ecoagrario de Abegondo: “ambas as dúas iniciativas suporán a xeración de oportunidades de crecemento económico vinculadas ao territorio”.

Durante o encontro co director xeral de AGACAL, o rexedor expúxolle a posibilidade de cultivar variedades de árbores froiteiras de orixe galega en diferentes puntos do municipio.

Conservación e investigación
Esta instalación cumprirá un dobre obxectivo. Por unha banda, garantirase a conservación de máis de 4.000 sementes autóctonas. Polo outro, servirá para estimular a investigación e selección das mesmas, favorecendo a súa mellora xenética e a súa mellor adaptación ao clima.

A nova construción, promovida pola Axencia Galega de Calidade Alimentaria, está situada nas instalacións do CIAM e contará cunha superficie de 1.822,65 metros cadrados. O banco estará dividido en tres módulos: o de persoal (711,3 metros cadrados), o de investigación (682,10) e germoplasma (357,05 metros cadrados).