Abegondo reunirá a máis de 2.000 persoas no seu Día da Familia

O Concello celebrará este domingo, 13 de xullo, o seu Día da Familia. Trátase dun evento xa consolidado e que promete alcanzar un auténtico récord en cifras de asistencia nesta nova edición. O encoro de Beche recibirá, ese día, a máis de 2.000 persoas. O alcalde, José Antonio Santiso, valora estes números, que referendan “que o noso Día da Familia é xa unha cita imperdible non só para os veciños e veciñas de Abegondo, senón tamén para os doutros concellos da contorna”. A xornada do domingo incluirá unha comida, pero tamén actividades, espectáculos, actuacións e verbena.

Só coas inscricións na comida, o Concello aproximarase xa á cifra de 2.000 persoas participantes. Con todo, tal e como explica o rexedor, “hai moitas que aínda non tendo reservada mesa se achegan a Beche e traen o seu propio xantar e tamén hai outras que se suman ás actividades da tarde”.

Despois da comida, prevista para as 14.00 horas, terán lugar as actividades lúdicas. As infantís consistirán en talleres, inchables e paseos en poni que se desenvolverán entre as 15.30 e as 19.30 horas. Ademais destas actividades, haberá festa da escuma para os máis pequenos e pequenas e dous espectáculos: Desastronauts, da compañía Somos Circo e varios pases da función 50 (1975-2025) do Mago Antón.

Ás 16.30 horas está previsto, ademais, o inicio dun campionato de tute e, a partir das 17.00 horas, haberá verbena con Xilo & Carlos e Paco Lodeiro e Noly & Alejandra, da orquestra Los Satélites. O Grupo de Gaitas e Baile de Abegondo e a Charanga NBA porán tamén o toque musical á xornada.

Para a organización do seu Día da Familia, o Concello contou coa colaboración da Axencia Galega das Industrias Culturais da Xunta de Galicia.