Abegondo e Alemaña estreitan lazos cun intercambio educativo entre o IES de Viós e o Instituto de Secundaria de Goslar

  • O alcalde, José Antonio Santiso, e o concelleiro de Infraestruturas e Obras, Alberto Seoane, recibiron, esta mañá, aos 14 alumnos e alumnas que están participando nesta experiencia e aos seus profesores

Abegondo e Goslar, unha pequena rexión situada en Sajonia (Alemaña), estreitaron os seus lazos. Todo grazas a un intercambio educativo no que están participando un total de 14 alumnos e alumnas: sete deles do IEs de Viós e outros sete procedentes do Instituto de Secundaria de Goslar. A experiencia iniciouse no mes de febreiro, cando os abegondeses viaxaron ata Alemaña. Agora, as súas compañeiras xermanas tomaron o relevo, e quedarán no municipio ata o próximo 10 de abril. O alcalde, José Antonio Santiso, e o concelleiro de Infraestruturas e Obras, Alberto Seoane, recibiron, esta mañá, aos estudantes e aos profesores que están tomando parte nesta experiencia.

Durante a súa intervención, o rexedor deulles a benvida a Abegondo, explicándolles a orixe do nome no municipio e revelándolles algúns datos sobre o mesmo. Así mesmo, aproveitou a ocasión para entregar aos rapaces varios agasallos institucionais como, por exemplo, libros sobre o concello e sobre observación ornitolóxica.

Ao longo dos próximos días, as alumnas xermanas realizarán unha inmersión completa no municipio. Tanto é así, que vivirán coas familias de Abegondo. Ademais da recepción no Concello, a experiencia incluirá varias actividades e saídas. Entre as propostas, os rapaces e rapazas visitarán a Reserva da Biosfera Mariñas Coruñesas e Terras do Mandeo e realizarán unha camiñata pola zona.

Trátase do primeiro intercambio ERASMUS+ que realiza o IES de Viós. Con todo, lonxe de ser unha acción puntual, o centro de ensinanza presentou un novo proxecto para o curso 2024/2025.

0 comentarios

Dejar un comentario

¿Quieres unirte a la conversación?
Siéntete libre de contribuir!

Deja una respuesta

Tu dirección de correo electrónico no será publicada. Los campos obligatorios están marcados con *