O alcalde de Abegondo, José Antonio Santiso, asinou esta mañá o convenio do Plan de Transporte Metropolitano da Coruña.

Os  concellos adheridos a este plan comprométense a levar a cabo as actuacións que se consideren necesarias para garantir unha mellor coordinación e conectividade entre os diferentes servizos e modos de transporte público, así como, no marco das súas competencias, mellorar a integración física das redes de transporte público.

Tamén se comprometen ao mantemento da aplicación da política  tarifaria establecida con base ao convenio formalizado de data 25 de outubro de 2010.

O delegado territorial da Xunta na Coruña, Gonzalo Trenor, presidiu a firma dos convenios de transporte metropolitano cos alcaldes que integran este plan na delegación da Xunta.

Este plan está integrado pola Xunta e os concellos de Abegondo, Arteixo, Bergondo, Betanzos, Cambre, Carballo, Carral, Cerceda, Culleredo, Curtis, A Laracha, Miño, Oleiros, Ordes, Oza-Cesuras e Sada.