O alcalde de Abegondo, José Antonio Santiso, recibiu hoxe a visita do delegado territorial da Xunta de Galicia na Coruña, Gonzalo Trenor. O obxecto da visita foi coñecer, de primeira man, o uso que o  Concello está a darlle ao seu novo coche eléctrico. O vehículo, valorado en 40.000 euros, contou cunha subvención da Xunta de Galicia de 32.000 euros –achegando o  Concello os 8.000 euros restantes-.

O rexedor agradeceu a Trenor a colaboración da Xunta e sinalou o compromiso do  Concello por seguir “apostando por tecnoloxía que permita reducir as emisións de CO2”. Como explicou Santiso, este vehículo está a utilizarse, entre outras cousas, para realizar a vixilancia de montes, control de verteduras e demais traballos relacionados coa área de Medio Ambiente.

Santiso apunta que o  Concello de Abegondo está subscrito ao Pacto de Alcaldes polo Clima. Froito dese programa, o goberno local presentou un plan de acción que contén medidas co obxecto de frear o cambio climático. O obxectivo é un descenso das emisións de CO2 dun 40% para 2030.